盧靖姍(Celina)今日到灣仔出席乳癌基金會活動 ，向女士呼籲要定期檢查身體，並即場分享媽媽患癌時嘅抗癌經歷，Celina話媽媽當時患胰臟癌，經過兩年同病魔對抗，雖然最後都不幸因病離世，但就令Celina學識好多嘢，佢話：「令我學識要Care自己身體，同埋媽媽抗病嘅過程亦都學識咗好多醫學常識，知道要點保持身體健康。」

Celina亦坦然擔心癌病會遺傳畀佢：「我之前買保險，保險公司話因為癌病有機會遺傳，所以有某幾種癌病佢哋係唔Cover，所以亦令我要更加學識保持身體健康，同埋生活事業要好好平衡。」

現時長居北京嘅Celina，問到同男友感情穩定，有無打算結婚？佢話：「順其自然啦，自己唔係一個有Planning嘅人，太多Planning反而會限制自己。」提到工作，佢話而家做緊一個大陸嘅綜藝節目，而主演嘅電影喺九月尾會陸續上映。

精選娛聞，喺晒《娛果》
http://fb.com/appledailyent