每年呢個時候都係拆聖誕禮物籃高峯期，hamper可以話係經濟寒暑表，經濟好hamper特別多亦特別有「內涵」。
不過，「內涵」唔一定要豪要貴，年尾當旺嘅鄭裕彤（彤叔），旗艦新世界集團今年送出嘅hamper，賣點係幫襯公平點（FairCircle），呢個機構以推動中、港公平貿易為使命，致力令農民同工人得到公平回報，保障佢哋嘅生計。據聞，新世界即使送禮畀其他企業機構，都盡量幫襯FairCircle，因為錢反正要使，不如順便做啲有意義嘅事。
新世界最近出咗本《香港旅遊及投資指南》刊物，目標讀者當然係國內同胞，有口痕友話，刊物除咗一般旅遊景點，其他shopping推介都係新世界旗下商場。咁就梗㗎啦，唔通新世界出嘅刊物會介紹你去行新地、長實嘅商場咩！