當年今日
關於我們

【多得阿女激勵】曾志偉相隔20年再奪男配角 如果曾國祥一齊拎獎冇得頂!

蘋果日報 2017/04/09 22:47

曾志偉一念無明

喺1997年憑《甜蜜蜜》奪得最佳男配角嘅曾志偉,今年憑《一念無明》再奪得最佳男配角,喺宣佈得獎一刻,囝囝曾國祥、余文樂都不約而都興奮企起身,全場亦傳出歡呼聲,之後曾志偉面帶笑容,好激動喺台上高舉獎座!
志偉喺台上話:「多謝,好緊張,好緊張,我諗唔到咁緊張,因為一路都以為都攞過,有乜嘢大不了,但越嚟越緊張,頭先睇到啲對手名單,太勁,Paul哥、達哥、智叔,呢三個好硬㗎,黑仔畀心機,我1部撼你26部,跟住就係你。」
志偉仲話:「呢啲就係宿命,對上一次攞獎,係新導演,佢叫陳可辛,多謝。今次攞獎,又係導演,佢叫黃進,大家多留意佢,佢係好導演,好多謝黃進同佢女友寫咗咁好嘅劇本,俾咗個咁好嘅角色我做,佢寫嗰陣已經同我講話個角色留俾我,但係我自己好怕拍啲咁重嘅戲,睇咗之係無法抗拒,上咗畫之後大家知道係城市話題,大家好鍾意呢條戲,喺現場冇諗過一個得28歲嘅人可以拍得出,同咁有心為香港寫一套咁嘅電影,多謝。」
志偉話另外一個要多謝嘅係,就係佢嘅對手余文樂:「冇諗到佢可以演得咁好,更加多謝佢喺現場完全唔同我傾偈,俾多啲時間我揣摩角色,頭先金燕玲下一城,我再下一城,跟住就輪到你喇!」佢又話:「最後我想再一次多謝專登飛返嚟嘅女,喺我第一次攞獎得到佢激勵,成日話爸爸你成日拍喜劇,唔知講乜嘢,可唔可以拍啲有深度嘅嘢戲,結果我第二次攞獎,thank you,好感恩今次我25年後攞獎,再感恩係今次金像獎竟然父子一齊提名,如果兩父子一齊攞獎,就冇得頂嘞!」