甘比囡囡做乜望住部機望得咁入神呢？梗係啦！自己生意喎！係要睇緊啲嘅！

近排喺外國好流行嘅「鬼囗水」，簡直係小朋友嘅潮物，主要係用黎減壓嘅。10 歲嘅甘比女Josephine 同佢啲同學仔都迷上咗呢個玩意架！ 唔好以為佢剩係玩喎！有個女首富媽咪做back up ，Josephine 就有本錢攞興趣黎做生意啦！

喺四個月前，Josephine 就開咗個Ig ，創立埋自家品牌「Chorus Slimes」，宣傳佢嘅鬼口水。阿女第一次搞生意喎，做阿媽嘅梗係大力支持啦！甘比成日喺Ig 幫手repost ，又叫埋啲網友一齊follow 阿女個ig。連班Auntie, 好似Sammi , Isabella , 千嬅都好落力幫手like!咁都未夠喎！

為咗support 阿女，甘比仲喺華置旗下嘅皇室堡，撥咗個位俾阿女擺咗部自助售貨機賣鬼囗水。呢日《壹仔》都有實地去皇室堡睇下部售貨機，間中都有中學生行過㩒下嘅。咦？不過原來大部分貨都已經賣晒喇喎！睇黎Josephine 要快啲補貨先得喇！

除咗透過Ig 宣傳，Josephine 仲開埋網站，上面Staff 嘅一頁，就寫住創辦人正正係Josephine 。至於大劉嘅英文名Joseph 就喺Admin一欄，媽咪甘比就做咗佢嘅Staff 。人仔細細，都唔係玩玩下喎，搞得幾有規模架！其實喺美國一早就已經有個13 歲小妺妹，開網店賣鬼口水，仲月入過萬，賺咗第一桶金。睇黎Josephine 今次都識得抓緊商機喎！又係嘅！有個做生意咁叻嘅老豆，虎父無犬女吖嘛！