當年今日

勁Game搶先睇:
OperationFlashpoint大美國主義

蘋果日報 2002/01/03 00:00


近排最Hit嘅DVD,當然首數《敵對邊沿》啦!由JudeLaw飾演嘅蘇聯紅軍著名狙擊手,與德軍狙擊皇牌大玩鬥智鬥力,真係幕幕都深入民心,假如你睇完套戲對蘇聯軍隊產生濃厚興趣,咁PC遊戲《OperationFlashpoint》金裝版內的新戰役《RedHammer》,就絕對為你度身訂做!呢隻Game擬真度超高,並曾獲美軍用作模擬作戰訓練士兵之用。不過呢隻Game亦大美國主義十足!因為你是飾演紅軍,所以不論你爆機與否,結局都是要負於美軍! 文:方樂鵬
OperationFlashpoint:RedHammer
類別:第一身射擊
機種:PC
發行:Codemasters
開發:BohemiaInteractive
發售中
擬真度甚高
講畫面,《OperationFlashpoint》一定唔係最掂嗰隻,操控重有些少鑊氣,但遊戲帶畀玩家嘅互動戰場Feel,暫時仍未有其他作品可以代替。唔講唔知,原來美國軍方都有用呢隻《OperationFlashpoint》嚟訓練士兵,單從呢一點就可以推想呢隻遊戲嘅擬真程度有幾高!今次GoldUpgrade除咗有新戰役之外,重加入咗唔少新軍用交通工具同新武器,蘇聯戰役的過場動畫和語音亦交足功課。
調轉槍頭扮蘇軍
以往同類型的第一身射擊遊戲,玩家多數是扮演美軍一方(上一集《OperationFlashpoint》玩家都是扮美軍),玩法千篇一律;但今次的《OperationFlashpoint》玩法就有點新鮮,因為玩家將要調轉槍頭,扮演蘇聯的前特種部隊「Spetnaz」成員DimitriLukin,而且橋段跟DVD電影版《敵對邊沿》的主角一樣位列國家英雄,不過兩者嘅待遇就差得遠,遊戲中的Dimitri因為態度問題遭受降級處分,以二打六身分參與入侵Malden的行動。期間可能火滾兼夾殺得性起,Dimitri所屬的部隊竟然唔為意打到過晒界,被困於敵方的範圍。最後惟有重新調配兵員和裝備,以游擊戰術脫離險境。
槍林彈雨難度超高
咪以為Dimitri本身唔係卒仔,呢場仗就易打到極。由於開發人員預計到參與《RedHammer》戰役的玩家,在上一集玩美軍陣營時已取得不少實戰經驗,所以今次遊戲的難度亦會以倍數提升,撤退行動中,子彈唔單止橫飛,直頭花灑咁四方八面掃埋嚟,一個不慎隨時提早Pack入袋(唔係裝備,係你條屍)返祖家。不過最可惜嘅係就算你點勁,始終都唔能夠幫蘇聯砌低美國佬,後段任務的支援更加愈來愈少,最終注定我軍慘淡離場。
網上Upgrade唔使錢
順帶一提,如果你本身已經擁有《OperationFlashpoint》,咁就唔使錢買GoldUpgrade版,直接到Codemasters的網站( http://www.codemasters.com/ )免費下載就掂。問到點解有人肯畀七十幾蚊去買原裝碟版,無非都係貪佢個本64頁嘅GuideBook囉!