豪宅地皮有價，帶挈具重建價值嘅舊樓，變得矜貴，業權分散嘅，都可以統一起嚟，組成業主會，全幢放售。好似薄扶林道九十八號福慧苑，一眾小業主清楚全幢放售會較值錢，最終套現瓜分所得，一定比各自出售可觀，於是聯合起嚟，委託置華物業全幢標售，目標價逾億，九月六號截標。
福慧苑由十個業主持有，包括九個單位嘅業主，同埋持有兒童遊樂場部份嘅發展商，十方經過半年磋商，終於達成協議，一致通過全幢標售。相對現時九個單位，每個市值五百餘萬至八百餘萬，合共六千四百幾萬，一齊賣個價明顯高企兼硬淨得多。
福慧苑佔地八千呎，九個單位總樓面逾萬四呎，重建後可增至四萬餘呎，以目標價一億計，每呎樓面價逾二千四。

恒基示範單位認真
樓盤示範單位經常人來人往，一般人睇示範單位，都鍾意拉吓啲櫃桶，開吓個廚櫃，所以櫃桶就通常會擺啲假嘢或者乜都冇，不過，恒基地產西灣河嘉亨灣示範單位，就出現像真度極高嘅廚房。
蘭西一如以往咁，入到廚房就上下其手拉開所有廚櫃，立即發現裏面擺滿零食，好似薯片、杯麵同餅乾等等，全部都係真嘢，可以一開即食，絕無花假。好奇之下再開埋雪櫃，一樣糧食充足，重豐富過一般家庭，西瓜、鮮奶、雞蛋同椰青，絕對製作認真，差啲以為自己返咗屋企，可以隨時開餐。
示範單位儲糧充足，真係就算道門壞咗出唔到去，都唔使怕餓親，不過如果啲睇樓客真係一邊睇樓，一邊摷嘢食，售樓處職員都幾唔得閒。