日本前日冇市，昨日補跌，一跌就係408點。日股跌，係驚中東局勢緊張刺激油價升，啲錢由股市走去債市。本港掛牌嘅日股指數窩輪有21隻，有冇興趣買賣？
日經C輪9162：日經C輪有13隻，最熱門係9934，有14球易手。照正日股跌2.8%，9934都應該好傷，但只係跌得4.4%，其他同類輪都跌1成幾。隻輪9月初夠鐘，輪價10.8仙，溢價6.7%，槓桿率36倍（有效13.9倍），引伸波幅29.3%。
博日股反彈，揀9934本來唔錯，但隻輪跌得唔夠，恐怕反彈之時力度亦會唔多夠。可以諗吓9162，呢隻昨日跌幅12%，明年3月初夠鐘，輪價24.2仙，溢價11.5%，槓桿率16.1倍（有效7.2倍），引伸波幅26.3%。

日經P輪9938：日經P輪共有8隻，最熱係9938，有16球易手，收11.1仙，升19%。睇日股跌，呢隻啱買，9月初到期，溢價4.5%，槓桿率35.1倍（有效14.4倍），引伸波幅24.5%。不過日股已經散咗好多，𠵱家至買恐怕遲咗，要做咗都係等日股升番啲至諗。
黃金窩輪：隔晚紐約期金散6.30美元，5隻黃金C輪同P輪有波動，波幅由跌18%至升105%。無謂搞黃金窩輪，佢哋有啲數據好唔合理，有啲唔容易摷到數據，大多數成交唔夠買賣難。
章盛