無綫繼節目《殘酷一叮》之後,會喺四月推出一個全新嘅遊戲節目,暫名叫《法王之王》。馮仁昭聽聞無綫高層好重視呢個免費為觀眾提供法律知識嘅新節目,計劃搵鎮台之寶鄭裕玲(嘟嘟)孭飛做主持之餘,重預成百萬獎金送畀觀眾,一於大灑金錢。而每集節目都會請法律界嘅知名人士嚟做顧問,好似早排被傳向無綫𢱑撈嘅謝偉俊,當然會預埋佢一份。
邊玩邊學法例
講到個遊戲玩法,係將過去一啲真實個案攞出嚟畀參賽者同嘉賓辯論對錯,等佢哋估下單案當中係咪觸犯咗法例。至於節目中列舉嘅個案,都可能發生喺每一個小市民身上,只不過係一般人冇乜點去為意,好似飲醉酒踩單車原來都係犯法,有車牌嘅人士會被扣分;另外,一個養育四子女嘅人,如果再幫人湊兩個細路嘅話,就會觸犯咗託兒條例,真係唔講都唔知!
張玉珊向華勝遊埃及返港
張玉珊同向華勝成日被傳分手,但噚日佢兩個就前後腳喺機場出現,原來啱啱去完旅行返港,張玉珊同記者講:「我同朋友去咗埃及旅行,不過有導遊同我講,如果要見埃及歷史文物倒不如去大英博物館睇。」另外,欣宜喺加拿大表演大受歡迎,張玉珊話見到欣宜𠵱家瘦得咁靚好安慰,不過就唔會同欣宜傾合作住,等佢大學畢業再算。
楊思琦雞年想做業主
楊思琦農曆新年喺工作中度過,佢話咁重好,可以𢭃多啲利是。問思琦有乜嘢新年願望,佢話:「我希望雞年可以身體健康,多啲工作,然後賺多啲錢,因為我好想買樓,不過相信呢個願望最快要幾年後先可以實現。」而思琦又話每逢節日都會精心挑選禮物畀家人同男友,今年亦唔例外。
任賢齊自嘲六十分情人
任賢齊噚日喺台灣為日前舉辦嘅情歌大賽冠軍情侶錄製單曲《那一年這一天》。小齊同Tina拍拖多年,但聚少離多,佢苦笑話:「我只能算是六十分的情人,合格邊緣而已。」今年小齊難得可以同女友一齊過情人節,去咗食浪漫情人節晚餐。
馬浚偉好友陪過情人節
馬浚偉噚日情人節冇約會佳人,反而同大班朋友度過,但馬仔一啲都唔寂寞,佢話:「如果對方唔係一生一世嘅,就唔好隨便慶祝,我已經唔記得有幾多年冇慶祝過情人節。」馬仔又話今個新年預咗五位數字嚟派利是,點知都係預唔夠。
周杰倫與女主播遊日
周杰倫同台灣女主播侯佩岑喺新年期間遊日本,俾台灣遊客見到,侯佩岑經理人話佢兩個只係咁啱撞到,而周杰倫唱片公司就話唔知佢同邊個朋友去日本。早排有相士指周杰倫同蔡依林今年會玩完,重話係周杰倫識咗第三者,估唔到今年啱啱開始,就傳出咁嘅緋聞。