踏入2019年，股市就總算紅盤高開，上返過26,000點。炒股嘅嘢，大家最想嘅無非都係以小博大；不過，歷史話畀我哋聽，以小博大呢種投資心態，都未算高手！真正嘅高手，應該係無本生利Der！

講遠嘅，大約十年前，有人就喺App Store推出一隻叫做「I am Rich」嘅App，開賣999.99美金！賣得咁貴，一定物有所值啦？嘿嘿，事實上隻App根本係一個廢App，你開咗佢，只會見到一粒發光嘅紅鑽喺度轉轉轉，然後寫住「I am rich, I deserve it, I am good, healthy & successful.」結果，隻App上架第一日，全球取得了八個下載，最後只有兩人向Apple申請退錢。雖然隻App第二日就被下架，但以7:3分賬計，呢位開發者仍然有4200美元袋袋平安。

講返近啲，Bitcoin、加密幣，呢類理論上係有價值嘅Crypto，前年都炒到癲。作為一個盡責嘅Sell屎，你以為一定要好似幣少咁，用好多錢去買（租）洋樓、買（租）名車，吹到隻幣點有投資潛力？NONONO，話說世界上有一隻幣叫Useless Ethereum Token，講到明係廢幣冇價值，開發者仲話，「Seriously, don't buy it」。不過，話知你係垃圾，當時只要你係幣，你就一定炒得起！上年年頭Crypto泡沫時，呢隻垃圾水漲船高，1粒UET值0.22美元，市值最高見91萬美金，相當700萬港紙。依家呢？最新市值都仲有5.7萬美元。

再講返近啲，大家一陣睇完呢篇文，同我一齊做一個Exercise：先上淘寶，然後輸入「教訓」呢兩隻字，你會發現，淘寶真係超乎你所想！你想買一個教訓？只需要畀1至2毫人仔，就可以買到一個「深刻的教訓」，講明「童叟都欺，貨真價實」！正所謂願者上吊，依家仲係On-shelf嘅教訓，最高銷量嘅賣出近2000個，賣1毫，即係total近200蚊！之前有賣家，以2毫賣出近4000個，屈指一算，0成本變出800蚊人仔！

寫呢三個Case出嚟，其實係想提醒大家，2019年，炒股時，千萬唔好以為貴嘢就一定有好嘢；見嘢炒貴咗，唔知頭唔知路，就衝入去買咗先算，點知發現自己買咗垃圾返來，喊得一句句。不過，所有「教訓」都係願者上吊，輸錢嘅，連淘寶都唔使上，自己真金白銀買咗個教訓返去，日日對住佢。買咗個「教訓」後悔？試下放上淘寶，睇吓有冇人要吧。

共勉之。

by千頌C@堆填區
http://fb.com/winbigwok