恭碩良（Jun）噚晩喺灣仔伊館舉行演唱會，唔少圈中朋友都有捧場，Jun仲搵咗JW(王灝兒)做表演嘉賓，女友林憶蓮好低調咁喺台下欣賞睇騷，不過佢梗係有後台探班，仲好大方咁同啲朋友一齊合照。

喺上台一口氣唱咗4首歌先講嘢嘅Jun，自己當咗今次係喺紅館開騷，聽到有男fans讚佢靚仔，佢好搞笑話如果係女仔叫佢就好。完騷之後阿Jun話見到有咁多朋友捧場，佢覺得好開心，因為佢有好多澳門嘅朋友過唔到嚟，講到女友憶蓮有嚟捧場，佢話：「有呀，梗係要嚟喇，不過我哋聽朝就要走，要做佢嘅巡迴。」

不過因為颱風海馬襲港，唔知航班與及海陸交通相繼停航，佢話：「打到嚟先算喇，本來呢個騷今晚會取消，我反而覺得知有颱風要有個打算，當然冇取消梗係好開心。」笑問佢係咪同女友憶蓮風雨同路？佢話：「你想我咁講咪話係囉！」