羅理雅今年四月墮馬受傷，上季季尾養傷缺陣，無可避免會流失大量座騎，今季復出後身手依然咁好，而且繼續獲得一眾華籍馬房的支持。今期夜賽（20日），炒飯哥將於第三場騎葉楚航馬房的「大寶庫」，兼排二檔好位，實屬贏馬良機。

出戰第三場五班1800米的「大寶庫」，最近兩年贏三場，目前雖然已經八歲，但能力仿如一匹六歲歐洲自購馬，戰鬥力猶在。此駒的性能均速，現時跑一哩已嫌短，1800米或以上長途啱跑。

上仗跑谷草1650米，前段放唔出，沿途居中跟跑，表現未見真章，熱身賽的敗績不需作準。上季跑同程獲兩冠一亞一季，四戰都跑入三甲，路程性能肯定好過同場的廄侶「滿貫中環」，改配本身較重磅的羅理雅，可以孭少啲死鉛出賽，今仗雖然是馬房第二選，但咪當是副車。