日本女星齊藤由貴將於周日踏入51歲，早前佢被雜誌《週刊文春》踢爆同屬摩爾門教徙嘅已婚醫生，身為有夫之婦嘅齊藤由貴否認發展婚外情，並開記招否認不忠，當時佢向在場約100名記者鞠躬致歉。齊藤由貴當時被《週刊文春》拍得約50多歲人夫醫生睇戲，散場更一度拖手離去，二人更被發現一星期見面四次，分別在寓所及報稱辦公室嘅單位內密會，不過指控都被齊藤由貴一一推翻。

事隔一個月，今日出版嘅爆料週刊《Flash》再爆驚人內幕，刊出一輯齊藤由貴同呢位醫生嘅親密自拍照，當中有齊藤由貴於兩年前為男方慶祝生日嘅照片，相中兩人容貌清晰可見，估計拍攝現場是醫院嘅醫生房，而另一張更係兩人咀對咀selfie，證據確鑿今次又點樣抵賴？齊藤由貴事務所對今次曝光嘅親熱照終於唔再否認，引述齊藤由貴對於呢輯相印象模糊，亦已作深切反省。人夫醫生方面就解釋係合成照，仲話會交俾律師處理，不過雜誌就指呢輯相片並無加工痕跡，估計齊藤由貴跟姦夫醫生嘅婚外情長達約七年。

曾是80年代當紅偶像嘅齊藤由貴都唔係首次爆出不倫戀，佢曾先後搭上同樣有老婆嘅尾崎豐及川崎麻世，亦與渡邊謙合演經典日劇《跳駒》時傳出緋聞。及至94年，齊藤由貴閃婚嫁圈外人丈夫小井延安，婚後育有三個子女。目前，齊藤由貴為當地手機商拍攝廣告，在廣告中飾演母親角色，估計呢次醜聞會飛起齊藤由貴，涉及違約金亦高達數千萬日圓。