這是一個老竇救仔的故事。韓宗博一直相信，努力搵銀、準時上繳家用，已盡父親的最大責任。為錢北上工作10多年，與家人聚少離多，一天回到家，他發現兒子中四輟學、沉迷打機度日，才驚覺「養仔唔係用錢就得」。人到中年，他決定轉行學廚，由零開始，只因兒子一句「對煮嘢食都有啲興趣」，冀以身教，鼓勵隱青兒子踏出房門，重拾人生目標。兩父子現時合伙經營車仔麵檔，韓宗博堅信沒有子女不能成材，「佢有我DNA呀嘛」，臉上難掩自豪笑容。

記者 梁銘恩

一對仔女每月數千元零用錢、聘3個補習老師教功課，再請外傭照顧，韓宗博是另類「佛系家長」，以為花了錢，不緊張、不催促，緣份到了，孩子自然會順利升學、長大成人。與很多港人一樣，為供樓，任職機械維修的他長年於內地工作，試過隔數月才回港一次，高峯期月入達20萬元。「嗰時淨係識泵水，冇了解屋企人需要」，直至7年前的一天，回家後發現兒子輟學成了「隱青」，他一臉愕然。

「我成日笑佢似女人坐月，一係就攤喺床，一係就黐住張凳打機」，足不出戶，連出房門吃飯都不願意，最誇張曾3日不吃不喝玩遊戲。太太無計可施，迫使韓宗博放棄內地工作，醒覺「要盡返老竇責任」，深入了解兒子生活。

以身作則做學徒

恃着父母愛錫、管教放任，大仔韓子俊習慣靠父幹。子俊憶述，15歲時對讀書喪失興趣，中四輟學後曾報讀職業訓練局課程，但因出席率不足被退學，亦無動力找工作，「要錢搵老竇咪得」，後來被經濟封鎖，才到餐廳廚房任兼職，但不久又辭工，故態復萌。

韓宗博見狀便鼓勵他發展興趣，更以身作則，2012年於僱員再培訓局報讀課程，最終取得初級中式烹調師（國家職業資格）基礎證書，以44歲高齡轉戰飲食業，在食品工場由學徒開始做起，「洗化油池、穿叉燒、每日劏70幾條魚」，月入跌至萬多元，全家靠積蓄過活，但他一直堅持，「如果我放棄，我個仔都會放棄」。

用枴杖打爆電腦

過勞工作令手腳勞損、腰痠背痛，以為苦肉計能換來兒子生性，子俊依舊無動於衷，眼中只有發光屏幕，韓宗博一怒之下用枴杖打爆電腦螢幕，卻戲劇性換來兒子反思。「對住部電腦邊度諗到嘢呀」，子俊說冷靜過後，終看得見父親的犧牲，「見到佢行路拐下拐下，係為咗我先搞成咁」。

子俊立心脫離廢青生活，跟隨父親步伐，2014年報讀再培訓局同一課程。畢業後經導師轉介入行，幾年間涉獵西餐、日本菜、意大利菜等，年僅22歲已是餐廳大廚。適逢父親節，子俊說會親自下廚，炮製二人研發的菜式「星洲炒飯」，供父親品嚐。

兩父子現時共同經營車仔麵餐廳，韓宗博說行行出狀元，學歷不代表成就，但要有良心回饋社會，「我生個仔出來，唔會對社會造成傷害」，是他做父親最卑微的心願。

-----------------------------
6月14日至22日 《GAME迷鬥一餐》
玩《小小金魚跳躍王》即有機會贏取 OUTBACK $100現金券
http://bit.ly/2HW1FUH
-----------------------------
【新聞有價】繼續撐蘋果
請往蘋果日報網站了解更多