渣打銀行上市,反應唔係幾好,其實呢隻股票喺倫敦早已有得賣,基金對佢嘅興趣當然唔會熱烈啦。渣打董事局有啲乜嘢猛人呢?十六位董事中,有六位執行董事,一位非執行董事,九位獨立非執行董事,其中有三位華裔,就係恒隆主席陳啟宗(美國人)、香港出身嘅周松岡爵士(英國人)、何光平(新加坡人);香港渣打銀行大廈嘅大業主就係恒隆集團,陳啟宗做渣打獨立非執行董事,理由好易明白。其他兩位同渣打咁好關係,左丁山唔知噃。周松岡爵士係中文大學三年制MBA校友,據賓架P話,與周爵士同班嘅,有陳鈞潤、關越強、陸觀豪、伍達倫博士、彭玉榮等。
何光平就係記者偶像。記得二十年前左右,何光平係《遠東經濟評論》記者,一兩篇報道令新加坡政府唔高興,自己成為新聞人物;佢真醒目,知道做記者坐監易,發達難,立即轉行搞酒店物業,好多賓架住過嘅高爾夫球酒店BanyanTree(布吉島)就係佢嘅,何光平大名響遍東南亞,發過記者好多。