「得5G者得天下」呢句話，喺IT界流傳已久。但你有冇諗過，「得5G者」其實也會「失自由」？5G呢個新一代流動通訊科技，可以係White Magic，令我哋嘅生活享受大大提升，亦可以係Black Magic，令我哋置身於《1984》或Black Mirror嘅世界，處處受監控。華為太子女喺楓葉國被捕呢單嘢，再次加深西方國家對華為企圖壟斷5G市場嘅恐懼，最新發展係華為同英國代表就產品安全漏洞開會不歡而散。有外媒已經討論，是否值得為廉價嘅5G服務，而犧牲個人私隱安全。問心嗰句，將來有得揀，你會揀美國版5G，定係強國版5G？

問呢個問題，唔係明示或暗示美國版5G無被監控嘅風險，而係喺強國，監控呢樣嘢實在做得太明顯、太張揚。根據媒體報道，強國現時有約1.76億個監控鏡頭，遍佈公共場所同私人地方，預計到2020年會額外裝配約4.5億個。相比之下，目前美國只安裝5,000多萬個監控鏡頭。另外，強國經常吹噓嘅人臉識別技術，早廣泛應用，高鐵入站要「刷臉」驗票，睇演唱會也有可能被人點相，就連街口亦運用呢種技術嚟捉人亂過馬路。用手機嚟監視特定對象，根本係小兒科。若果將來有更強嘅流動通訊數據傳送技術，呢啲監控又點唔會變本加厲？

不過，公道啲講，5G的確將會令我哋嘅生活出現好多重大變革。試諗下，將來喺5G嘅世界裏面，數據傳送速度比現時4G快10倍至100倍，以每秒1Gb以上的速度傳送數據，唔使10秒便完成下載一部4K超高清電影，時延（latency）從現時50毫秒縮短到1毫秒，上網打機完全無lagging或停頓咁滯……

仲有嘅係，有咗5G就可以完全實現講咗好多年嘅「物聯網」（Internet of Things），即係將啲物件過感應器連接至互聯網，做到「萬物互通」。例如由AI打點家務，仲識自動幫你check塞屎渠同搵通渠師傅上樓服務嘅智能家居；政府推動智能城市亦無難度，無人駕駛汽車、無人商店、自動交通同空氣質素監察系統；醫療技術亦將有大躍進，仲有機械人可以越來越似人，應用更廣；仲有……嘩，睇起嚟好似好美好。呢種高速、大傳送量兼低時延嘅數據傳送技術，真係可以實現科幻小說同電影裏面嘅未來「美麗新世界」（Brave New World）？！

有人就話，要令5G廣泛得到應用，有關網絡系統嘅架設同埋相關硬件，就要取得所謂嘅economies of scale，亦即畀啲5G電訊商藉着擴大市場嚟減低生產成本。嚟緊呢年，全球各地將陸續展開5G網絡架設工程，邊間電訊商取得歐美等地嘅大單，已經可以話係「號令天下」。華為的確有佢嘅優勢，如果唔係美國人又點會追住佢嚟打，之前已有不少國家因美國壓力而講明棄用華為，外媒又不斷深挖華為同強國政府，特別係同軍方嘅關係。早前有傳，非洲聯盟總部電腦系統遭強國黑客入侵，啲機密數據每晚被傳送到上海，而聯盟所用的電腦系統正係華為提供，呢單嘢近日又被澳洲媒體提起。日本仲話，喺華為電訊設備中搵到多餘嘅嘢，其他國家又點會唔驚咗華為，就算真係好平，都話唔制，國家安全至上嘛。你知啦，5G咁勁，一旦被當成武器，後果不堪設想。

依家已有人推測，「兩雄」相爭，將來全球5G網絡或會出現類似冷戰格局，分成由強國與美國技術主導嘅兩大「東」、「西」方陣營，最後邊個一統天下，真係好難想像。強國要力撐華為，相信香港好難走得甩，傳聞本地已有公司夥拍華為搞5G，香港人最終或要硬食！

花生蘋論員

【編輯推介】
唔想錯過兩岸最hit話題？快啲click嚟睇！
【中美貿易戰】中國終跪低 元旦起暫停對美汽車及零件加徵關稅3個月
【華為危機】演出《爸爸去哪兒》爆紅 加拿大籍夏克立微博發文道歉
【邊個責任？】13歲仔狂毆同學後猝死 家長喊冤：還我孩子命！