證券商協會今晚喺金鐘一間酒店筵開40席搞33周年晚宴暨就職禮，最特別係，有股壇「校長」之稱嘅聯交所前主席李福兆繼三年前現身，今晚再做座上客。李福兆94年離開香港，長居泰國，近年有傳聞話佢身體抱恙，即管睇吓佢係咪風采依然。
李福兆今年84歲，股民一定識佢。87年股災，就係佢以聯交所主席身份，宣佈停市四天，股市重開恒指大瀉，佢被人鬧到飛起。

傳金勞詹打針美顏

佢離港多年，證券商協會2010年慶祝30周年，先至搵到佢畀面回港出席周年晚宴，當晚佢仲上台玩棟篤笑，笑話自己唔係炒股，而係「燉」股票，初期就燉公用股、地產股。
聽聞今晚佢只係做嘉賓，唔表演，會唔會歌癮起上台唱歌就唔知，事關今晚玩懷舊，請來盧海鵬做表演嘉賓，好似話會唱羅文經典舊歌，十幾位會董又努力練歌，諗住唱甄妮嘅《奮鬥》做壓軸表演。
除咗李福兆，前立法會金融服務界議員「金勞詹」詹培忠都可能係全場焦點，佢今晚亦係座上客，傳聞佢早排飛去烏克蘭做幹細胞注射，66歲打呢種針，梗係為咗回復青春靚仔樣啦。話時話，點解越來越多男人走去減肥或者打針回春㗎呢？邊個話貪靚係女人專利。

李華華
mailto:[email protected]