第一上海（227）半年插水62%，跌到落上年「8.17」大奇迹日水位，殘到飛起。家陣可以兼營B股嘅證券股，得第一上海及申銀萬國（218）。呢期祖國股市同樣表演插水，市場已經憧憬減股票印花稅嘅刺激方案。
要咁睇，阿爺振興方案以至港股直通車，其中一瓣落實，第一上海已經有point狂炒。呢期陸續有外資大孖沙話國企股有勢見底，第一上海食住B股及本港兩瓣證券業，講實際得益，第一上海亦享雙重受惠。
第一上海NAV1.8元，現價（1.6元）P/B得0.88倍；同樣係中資證券股嘅申銀，P/B高企兩倍，第一上海殘到飛起。
再講，第一上海07年半年度（6月底止）純利狂飆1.7倍到2.44億銀，就當下半年冇錢賺，全年度純利keep呢個水位，集團預期PE都係得8倍單位數。就以呢個PE倍數計，第一上海翻半番到2.4元，預期PE都係得12倍。

世城夠鑊氣隨時起步

世城（355）齋計酒店資產重秤後嘅NAV0.18元，現價（0.105元）折讓42%左右。雖則，世城唔係同系NAV折讓最大嘅股份，但本身已經有一定嘅折讓空間。況且，埋身短打，講有冇承接力，鑊氣係咪足，同富豪（078）及百利保（617）比較，世城鑊氣最夠。世城3月尾升穿咗1年下降軌，上個星期整埋後抽，隨時起步。呢轉短打，博世城上番2月高位0.137元，世城未有耐上到NAV，而現價回報率28%，亦已經有魚有肉。