今日係一代武打巨星李小龍逝世45周年，除咗李小龍會一連10日舉辦《李小龍－動．漫．遊》展覽，展出逾100件世界各地以李小龍為主題嘅動漫同遊戲作品之外，資深製作人兼李小龍生前好友蔡和平、李小龍會等人，今晚都喺旺角搞咗個「群星齊賀功夫傳奇李小龍45周年」嘅私人晚宴，出席者包括現年8歲嘅日版迷你李小龍今井竜惺、鄧梓峰、郭秀雲及各地嘅李小龍fans。

今晚出席晚宴嘅仲有位外國電影公司製作人叫George Tan，佢從李小龍律師度得到李小龍生前最後寄出嘅一封信，George今日帶埋封信嚟，佢仲展示咗兩張李小龍簽名相，話李小龍臨死前簽名喺張相上面，畀咗一個姓李嘅人，而姓李嘅人就畀咗George。

講到李小龍最後呢封信，其實早年曾經公開過，係1973年7月20日寫嘅，正正係李小龍離世當日，係李小龍寫畀律師Adrian。George今晚同《蘋果》話自己1990年喺Adrian手中得到李小龍寫畀佢嘅信，因為Adrian知道佢會拍關於李小龍嘅戲，所以畀資料佢睇。

睇番封信，地址係李小龍當年九龍塘地址，信中內容係話自己8月3日會到美國洛杉磯，想Adrian到時同佢見面傾一啲工作問題。

蔡和平接受《蘋果》訪問時話:「我隔幾年就會搞一次李小龍影迷聚會，對上一次係5年前，相信50周年會大搞，大家都係聚吓會食飯，同埋有個嚟自日本嘅8歲小朋友，佢好中意李小龍，同埋好多嚟自外哋嘅fans都有嚟聚會，丁珮姐姐今日就唔會嚟架啦，聽日先會同嚟自唔同地方嘅影迷見面。今晚11點半，呢個時間係當年李小龍宣佈死亡嘅時間，到時會有一分鐘默哀向佢致敬，大家都係一齊聚吓傾吓偈。」

今晚除咗各地龍迷分享李小龍故事之外，今井竜惺都換咗套黃色衫扮李小龍耍雙節棍，全場人睇到眼定定，大讚今井竜惺叻仔。今井竜惺話自小爹哋畀佢睇李小龍片段，所以接觸到李小龍，自己最中意係睇《猛龍過江》呢套戲，4歲開始就學功夫。

至於郭秀雲就話:「自己第一次出席李小龍迷聚會，我自細好欣賞李小龍，作為一個中國人，以佢為榮。」郭秀雲話李小龍喺三藩市大，同自己一樣，而自己個仔(龐景峰)嘅混血成份，同李小龍一模一樣，自己個仔都係李小龍迷，有儲李小龍嘅衫同睇李小龍嘅戲。佢又話:「阿仔曾經想向K-Pop發展，自己都勸佢做番自己最中意嘅嘢，見到阿仔家好勸力練功夫做運動。」

精選娛聞，喺晒《娛果》
http://fb.com/appledailyent