陳勳奇、汪明荃、邵音音、陳志雲、梁振英、方國珊、甄珍、劉子千、張玉珊及鄭丹瑞等，今早前往方逸華追思會，陳勳奇昨晚由北京趕回港，他表示方小姐生前對他非常好，問及與方小姐有甚麼難忘回憶，他說：「我15歲在邵氏長大，係自己一個成長嘅地方，方小姐當時好錫我，我以前後生仔好反叛，成日激親佢，做錯好多嘢，佢都原諒我。我離開邵氏後自己做導演，佢都叫我返嚟幫佢拍戲，係葉德嫻同袁詠儀嘅《沒有老公的日子》。」

陳勳奇早前患甲狀腺未分化癌，抗癌一年漸漸康復，今日見他精神甚佳，他慨嘆：「呢次癌症應該係我走先，老天爺覺得我任務未完成，近10幾年我喺大陸做一啲關心下一代嘅事，可能因此上帝叫我唔好走住，繼續完成任務，抗癌成功後第一套戲就係《美麗戰爭》，鼓勵殘疾人士可以殘而不廢。」

陳勳奇笑言自己兩隻老虎都打得死，他又指成龍大哥稱「你唔死得㗎，《十二生肖2》預埋你」，王家衛又說「你唔好死，《一代宗師2》要你拍」，他指：「有兩大任務喺袋好清醒。」