甄子丹噚日去咗山頂杜莎夫人蠟像館，出席佢個《葉問2》造型蠟像記者會。雖然個蠟像仲未起貨，不過佢就話好期待。司儀介紹佢出場嘅時候除咗稱呼佢做「丹爺」之外，仲話佢已經「由宇宙返到嚟地球」咁話，難得佢一直笑笑口，仲喺現場整番隻蠟手做紀念㖭。

「多啲嚟同我傾偈」

之後佢同記者傾偈就話：「個蠟像4月尾先會完成，到時會帶埋仔女嚟睇。我成日周圍飛，如果大家第時搵唔到我可以上嚟山頂探我。」記者笑佢，話佢老婆汪詩詩可能都要上到山頂先見到老公，佢就搞笑咁話：「係囉，多啲上嚟同我傾吓偈囉。」
子丹家喺內地拍攝講關公嘅新戲，佢好勤力咁準備套電影：「家要睇劇本同好多歷史，同埋要增肥，不過我練咗幾十年功夫，本身都有肌肉，食番多啲嘢就好似吹波咁，最緊要就係演到個霸氣同氣概。」
問到被邀請造蠟像，會唔會有吐氣揚眉之感？子丹話：「《葉問》可以話係我嘅代表作，希望第二集可以再深入啲觀眾嘅記憶。就好似一講李連杰大家就諗起黃飛鴻，一講周潤發就諗起Mark哥，我好幸運可以扮演葉問。」