在土共一片反曾謾罵叫囂聲中，商界繼續向當奴「雪中送炭」！繼誠哥之後，九倉主席吳光正亦跟住表態，聲稱無論邊個做特首，最緊要係唔將私人恩怨帶到公職上！
土共就係出於私人恩怨瘋狂反曾！以北角騎呢版蔡菜子為總代言人，直頭同當奴秋後算帳，話佢要好好「反思」四十年來緊跟「港英」嘅所作所為，言下之意，即是警告埋當奴細佬曾蔭培，一九六七年在前殖民地警隊，為捍衞社會繁榮穩定，堅決執行鎮壓土共嘅暴動，亦要因住嚟！
土共惡言惡相，梗係唔係為咗「愛國」，而係準備向當奴伸手要官職、要資源、要錢要權，開出至少教育統籌局局長一個高職，點名要由曾鈺成來坐，至於其他工聯會等所謂職業培訓等等種種撥款，雖然廢董七年，一早經已鬆章過水，亦嫌唔夠，當奴上台，一定要追加！
土共在左邊喊打喊殺，泛民主派啲大狀律師又嗌反釋法，係咁左右夾攻！當奴就算苦口苦面咁解畫，主張早日釋法，土共都唔滿意，亦唔領情喎！民建聯哨牙劉就追擊當奴，話既然釋法合情合理，點解當奴解畫解得咁痛苦？