《衝上雲霄II》，角色唔同晒，但睇完第一集，大家總算都可以收貨，節奏流暢得嚟，角色都交代得清楚，裡面仲有好多gag位添！

新角色顧夏陽(張智霖飾)，一出場就玩媾女，睇中飾演Model嘅朱璇，講起朱璇，佢一嚟就用索腿同露背幫大家醒醒神，咁好有型嘅顧夏陽就畫咗張Portrait送俾佳人，話大家係同一班機喎...咁嘅識女仔方法，得型仔機師先做到，盛男唔好亂咁學呀！

做正經嘢嘅時候，Chilam直頭金句多籮籮，又話自己「從來唔會遲到」、又對住馬國明等等嘅副機長講「我鍾意最後一刻先出現，因為唔使對住你哋班廢物咁耐」wow，好mean呀！

而且呢個顧夏陽，或者叫「Cool魔」，擺明係風流倜儻feel，所以Chilam全程chok樣，當飛機要飛過雷雨雲帶時，佢仲從容唱歌，嘩，真係邊個夠佢玩，到成功安全著陸，「Cool魔」又彈咗一句「人類就係因為有冒險精神先唔甘於喺地上走，要去天上飛...」嗚呀，好型呀！連高級副機長之一嘅唐亦風(吳卓羲飾)都話「Cool魔」有語錄，又講多句「安全飛行係基本，識得享受過程先係最高手。」唔知個語錄喺之後係咪會陸續有嚟？