西九管理局董事局又有人離場，換言之，又有新面孔登場。政府今日宣佈，特首委任一批西九管理局董事局成員，新面孔中最注目可能係潘楚穎，爸爸係廸生創建執行主席潘廸生，媽媽則係溢達集團董事長楊敏德，哈佛大學畢業嘅潘楚穎係非牟利機構「中國教育行動」及「進念二十面體」董事會成員，一直熱心公益事務，今次就被娥特睇中，委以重任。

另一令人注目嘅係中信泰富前董事總經理范鴻齡、即係羅范椒芬嘅胞兄。范鴻齡近年重出江湖，先後獲任唔少公職，包括擔任政府早前新成立嘅「檢討自資專上教育專責小組」非官方成員，香港興業亦有委任佢為集團獨立非執董及薪酬委員會成員。

董事局副主席繼續係德高望重嘅夏佳理，而今次退任嘅委員則包括新世界鄭志剛、立法會議員馬逢國等。其實鄭志剛6年任期都未做夠，提早卸任，唔通貴人事忙？據聞佢試過以Conference call開西九會議噃...

政府發言人話，一眾獲委任人士喺各自範疇都有專業經驗同專長，能為董事局提供寶貴意見。呢批董事局成員任期聽日（23日）起至2020年10月22日，為期兩年。

立會補選新聞，《蘋果》一網睇晒
http://bit.ly/appledaily1125