早排潮流興hashtag「#一句說話激嬲邊個邊個」，如果對象係恒隆地產（101）董事長陳啟宗，呢句可能係「昆明商場停工」！
話說早前有傳聞指，恒隆旗下昆明商場停咗工，唔知幾時開張，噚日業績會有人問起，陳啟宗靜咗幾秒，諗清楚措辭先開口：「昆明從來冇停過工，唔知邊個幻想力咁強」，昆明商廈已經起到十幾樓咁高。

叫大家睇有水平嘅傳媒

佢強調，自從90年代初進軍內地做地產，從冇試過怠工、停工，好玄咁拋出一句「好似空中有好多聲波，我哋都睇唔到，但存在」，又叫大家「你最好睇嗰啲比較有水平嘅傳媒喇，有啲嘢係唔值得睇嘅，做人要有分辨能力」，寸嘴本色不減。
陳啟宗一輪嘴反擊，坐附近嘅兒子陳文博就好乖咁學嘢，不過佢同爸爸明顯唔同style。噚日見佢答問題非常小心，坐喺師傅、即行政總裁陳南祿隔籬，互相推波叫對方答問題，「please please please」睇得出兩位感情唔錯先至咁樣玩。
講到沙田神召會學院重建項目被地區人士反對，陳文博就比較小心，答完之後問問師傅有冇補充，主持人關則輝幫佢補充數字時亦都不忘講句Thank you，相當有禮。

李華華
mailto:[email protected]