黃宗澤(Bosco)舊愛胡杏兒就身在北海道同老公李乘德(Philip)度緊蜜月，好巧合Bosco都啱啱去咗日本。Bosco爸爸黃廣義早前因肺癌離世，享年72歲，上個禮拜Bosco先為爸爸搞葬禮奔波，噚日就飛咗去福岡,同朋友散心。

本報讀者黃小姐噚日就透過爆相爆片，喺日本福岡機場捕獲Bosco，當時大概4點幾，佢同幾個男士包括助手齊齊過海關。Bosco就由頭到腳都潮人look打扮，着住老虎圖案棒球褸、黑色短褲、戴住黑色cap帽，揹住個豹紋背囊，拎住一件長褸排隊。可能Bosco唔想俾人認得，更帶住個黑口罩，期間都有同隔籬男助手有傾講，不過見佢都有點倦容。Bosco就回覆《蘋果》:「之前計劃咗，忙完工作同爸爸身後事，同朋友嚟散心。」

另一邊，杏兒就同老公Philip滑緊雪，今朝仲喺微博貼圖，紅噹噹滑雪情侶裝留言：「大鄉里第一次滑雪！」