英國男星曉格蘭特（HughGrant），前年同華裔前女友TinglanHong「搞出人命」，誕下女兒Tabitha後，阿曉噚日喺twitter自爆女兒多咗個細佬，又話兩仔女有個好酷嘅媽咪。過咗一陣，阿曉再次抵死留言話﹕「再講清楚啲，我係老竇﹗」咁阿曉同Tinglan究竟幾時拉埋天窗呢？

點解阿曉無啦啦會自爆喜訊？因為英國《每日郵報》披露咗佢哋拎到阿曉囝囝嘅出世紙副本。囝囝全名叫FelixChangHongGrant，出世日期係上年12月29日。阿曉上個星期先同老友講喜訊，包括佢嘅舊愛兼女兒契媽伊莉莎伯凱莉（ElizabethHurley）。《每日郵報》日前打畀阿曉確認喜訊嗰陣，阿曉就大方宣佈喇。