正當不少人批評郭晉安在大台劇《白色強人》演的奸角表情十年如一日，同時段對撼，由廖啟智、陳秀雯、劉俊謙、朱栢謙和岑珈其等主演的ViuTV新劇《教束》便成為黑馬，口碑更勝《白色強人》。《教束》大部份都是新人面口，講述新晉老師盧文達（劉俊謙飾）為免被校長（廖啟智飾）炒魷魚，不惜預先派試題給學生，最後被副校長（陳秀雯飾）威脅，要令一班壞學生搶到學生會的主導權。

劇集節奏明快，近日播出學生會選舉戰況，與近日《逃犯修例》風波不謀而合，不少人都覺得學校鬥爭，正是現今香港政府的投射縮影。昨日的劇情講述傳統精英班Oasis與「騎呢派」不老騎士的選舉之戰，有老師竟然帶隊去投指定的候選人，有老師表明︰「唔搞事內閣最適合不過。」而另一批沉默分子罕有地出來投票，最後兩方陣形打成平手，最後兩隊內閣成員都要投票，精英班Oasis竟然有人投對家一票，令不老騎士勝出，他說出心聲︰「選學生會唔需要咁多計算，攞個心出嚟去做就得㗎嘞。我明日就移民㗎嘞......。」

而日前劇情亦有講學生出來示威，聲援被學監會聲討的不老騎士，其中飾演小一生的同學說︰「其實我哋想畀學校知道，我哋都有參與過，如果我哋冇食，我哋都冇違規。你哋（學校和老師）根本冇正視過問題，梁sir你哋知唔知個問題喺邊？」阿Sir則用記大過威脅學生，幸最終有學生家長衝擊閉門會議，力撐學生︰「我同學校講過幾多次要正視問題啊？你哋有冇跟進過？冇啊嘛！你哋淨係識得解決提出問題嘅學生，呢啲係大人嘅事，應該由大人解決，唔應該咁樣懲罰學生。」不少網民都留言激讚︰「完全照住香港嘅政治情況嚟做，勁吖！」、「喜歡嗰個中一生，初心但堅毅的眼神、可代表我哋勇敢的新生代。」

曾憑《點五步》獲金像獎最佳新導演提名的《教束》監製陳志發，今日接受《蘋果》電話訪問直言拍攝時沒有想過有如此多迴響，他說︰「冇㗎，真係冇諗咁多。一個政治體系，如蛇齋餅宴，永遠都有精英主義用盡方法保持原有嘢，我哋係用呢個思維繼續寫落去，但其實我哋都係講緊一個學生會。」他還特別讚揚導演黃智揚︰「好多笑位都係佢諗。」他稱自己都有去遊行，坦言是200萬零1個人其中一個，他說︰「本身導演會都有發聲明，過程中我哋有聽大律師專業意見後先去投票，分析過諮詢時間真係太快，唔明點解唔先處理台灣謀殺案先。」

7月4日起 《蘋果動新聞》只限升級壹會員閱覽
繼續撐蘋果！
https://hk.adai.ly/e/iIRREmuwDX