最近人人講年金，資深股評人陳永陸（陸叔）原來都已經夠晒年齡買政府牽頭推出嘅公共年金（65歲可買），噚日係陸叔66歲牛一，佢笑言係「66無窮」，陸叔有股又有樓，一定唔窮喇。

兒孫滿堂嘅陸叔打算星期六全家出發飛新加坡，重遊舊地，點解話係舊地呢？唔講唔知，陸叔30年前，即係1988年曾經替德銀打工，當年佢被派去新加坡做開荒牛，帶埋老婆仔女一齊飛過去生活，仔女當年只得三五歲，喺當地讀書。
兩年後，陸叔決定轉工，獨自一人返港，出任大福證券（現稱海通證券）副董事總經理，老婆仔女就喺新加坡多住一年先至返港。轉眼30年，家陣陸叔一對仔女都已經各自成家立室，並且育有自己子女。陸叔今次就係打算帶埋四個一歲到五歲嘅寶貝孫，舉家去新加坡重遊以前住過、留過腳毛嘅地方。
所以話呢，真係人生匆匆，轉眼就幾十年，退休或被退休嘅日子可能話咁快就到，咁陸叔又點睇年金呢？陸叔都算坦白，指自己識做投資「無謂買喇」，佢反而建議做仔女嘅，可以拎錢出嚟買份年金送畀父母，當係孝順父母嘅一點心意。

李華華
mailto:[email protected]