大家心目中的最有影響力的遊戲角色係邊位呢?相信好多玩家都會揀Mario,因為這位「意大利大叔」由細就陪住大家長大,只要Mario一出場,大家就會爭住畀錢買新遊戲,不過《Time》(《時代雜誌》)就唔係咁睇。《Time》日前就公佈了獲選為最具影響力遊戲角色的15個角色,《超音鼠》Sonic排第6,《薩爾達傳說》林克排第5,比卡超排第4,《Pac-Man》食鬼排第3,而《盜墓者羅拉》Lara Croft排第2,暫時睇都好正路,第1名應非Mario莫屬吧?不過勢估唔到,排1名竟然唔係Mario,而係Mario千辛萬苦拯救的Peach公主,Mario竟然15大不入,而且離譜到連《俄羅斯方塊》入面的「Z」型磚塊都可以排到第15位!到底點解Peach公主可以獲獎?《Time》解話說原來Peach公主設定是經常被Bowser綁架而只識得嗌「救命」,以及等待Mario及Luigi攀山涉水去營救,但角色設計在之後有變化,如在《Super Mario 3D World》中就變成一個可操控角色協助Mario及Luigi,到《Mario Kart》時有份同其他角色平起平坐一同賽車,並大受歡迎。簡單來說評審重點是以「男女平權」作為第一考慮,觀點同角度同一般玩家未必一樣,唔啱大家心水的話一笑置之好了。