單幢樓,過去一直都難賣兼唔可以賣得高價,呢個定律𠵱家要改寫嘞!由九龍城大地主──國際集團發展嘅博林軒,全幢48伙,半個月內已經沽清;其中連天台嘅單位,重係以97年後同區新高呎價賣出。
代理中原地產助理董事王鎮維話,呢個頂層連天台單位,面積590呎,另天台250呎,成交價338萬,呎價5729蚊。至於最後一個連平台單位,594呎,平台400呎,以290.8萬售出,都要4896蚊一呎。
家陣博林軒重有5個二手放盤,主要係750呎嘅3房A單位,叫價比購入價高一成半,呎價4100至4600。
姊妹花中秋送樓畀爸媽
香港人買樓,有時同行開街順便買件衫差唔多。
中原高級分區經理鍾耀強表示,一對姊妹花,中秋節陪阿爸阿媽飲茶,跟住一齊去睇樓,睇完荃灣麗城花園二期四座中層E單位,阿爸阿媽覺得間隔四正,都幾鍾意。兩姊妹二話不說,即刻拍板用173.8萬,買畀父母換樓,當做中秋禮物,認真孝順!
奧運旋風颳入深圳盤
中國奧運健將揚威返國,即刻被各商業機構招攬協助宣傳,繼早前和黃番禺珊瑚灣畔請嚟多位奧運健兒幫手宣傳後;深圳大梅沙嘅「心海.伽藍」,都請咗彭勃、吳敏霞、勞麗詩等奧運健將參觀,呢個消息重吸引唔少業主,同大批市民走圍觀,當然唔少得攞簽名。
樓盤推出嘅首批百二套單位,平均呎價880,經已沽清,套現億三。
發展商深圳市心海投資計劃喺十一國慶,推出30套袖珍型全複式海景單位;睇番資料,樓盤最細都有802呎。