馬英九當選咗總統之後，台灣嘅風頭一時無兩，大搞兩岸直航包機搶香港旅遊生意。早幾日之嘛，中國大陸集合咗33家旅遊業考察團去台灣環島，佢哋比港人仲識貨，唔只係識玩台北，第一站就去咗近日當地大熱嘅宜蘭，體驗亞洲第2長嘅雪山隧道，再搭船遊龜山島，駛到太平洋睇鯨豚，點知遇到五級浪，搭到暈船浪，仲睇唔到鯨豚。
好在小妹都唔執輸，截咗佢哋糊，早佢哋一日去龜山島同睇鯨豚，為香港人爭光；梗係要介紹吓呢個台灣勁hit嘅景點啦。

風急浪高好震撼

以前由台北去宜蘭，搭車要成兩、三個鐘，但自從打通咗雪山隧道，由台北車站搭巴士去宜蘭，一個鐘車程。小妹去咗宜蘭有美人湯之稱嘅溫泉鄉礁溪落腳，真係浸到啲皮膚滑溜溜。由礁溪搭的士去頭城烏石港碼頭，約15分鐘，再搭船去龜山島，繞島賞鯨豚，費用1,500台幣（約400港元）。
小妺同男友預早一日訂位，早上8點幾出發，船上個個人着晒球生衣，好鬼認真，點知出到去好大浪。眾人首先登上台灣目前唯一露出水面嘅活火山龜山島，參觀島山嘅炮台等軍事設施，真係大開眼界。跟住大家離島再登船出太平洋賞豚，點知海面波濤洶湧，船長話有五級風浪。搵咗成個鐘都睇唔到鯨豚，但小妹冇失望，因為咁大個女都係第一次搭船出太平洋，體驗乜嘢叫風急浪高，好鬼震撼，之前搭過嘅海盜船根本冇得比。有興趣又夠膽，不妨試試，頭城漁會網址 http://www.etcfa.org.tw。
電郵：mailto:[email protected]
逢周六、周日刊出