憑韓國人氣育兒節目《超人回來了》而人氣急升嘅男星宋一國同埋三胞胎囝囝，一向深受觀眾歡迎，宋一國仲專登開通Instagram，分享三胞胎嘅點滴，等粉絲雖然唔可以再喺《超人回來了》見到三胞胎，但都可以透過網上得知三胞胎嘅情況。

三胞胎大韓、民國、萬歲仲有兩日(16號)就踏入6歲，宋一國今日凌晨就上載咗三胞胎嘅一段片，仲留咗一大篇言，當中三胞胎喺片段中就着上水手服，之後仲敬禮大喊：「忠誠、稍息、立正」，仲恭賀叔公退休，最後分別向住鏡頭獻吻，十分可愛(相關片段連結： http://bit.ly/2FCPzAc )。

由於今日係白色情人節，所以宋一國亦回想起白色情人節嘅記憶，仲直言呢一日對佢嚟講好有意義，佢自爆喺平安夜向太太求婚，但卻一直得唔到答覆，就喺第二年嘅白色情人節，太太竟然將戒指盒畀返佢，當刻宋一國就以為求婚被拒，不過佢太太就話佢已經答應求婚，仲戴上咗戒指，但係太太嘅父母就未同意。宋一國仲爆料話好在佢高中老師(即佢太太嘅叔叔)喺未來外父外母面前講盡好話，所以佢最後先娶得美人歸，仲生咗三胞胎三個咁可愛嘅兒子，所以喺今年嘅白色情人節，宋一國就特別想念呢位今年退休嘅老師，同時亦留言：「謝謝老師」。

更多韓流，喺晒《娛果》
http://fb.com/appledailyent