七月一日，係香港、香港人驕傲嘅一日。當日究竟有幾多人上街示威反二十三條、反董，其實冇人知得清楚，靠估話係五十萬人就五十萬人啦。左丁山事先計數，知道維園一定插針不入，警方唔會合作大開中門，坐喺維園裏面一定困死，變乾煎蝦碌。於是放棄咗去天后地鐵站加入FCC大隊，改而揸車停喺中環，再搭電車落灣仔插隊。唔好話左丁山示威冇誠意，不過自知脾氣唔好兼皮膚唔受得太陽直曬（十一年前曾曬出個禍，之後可免則免），先至諗縮數。

電車去到灣仔軒尼詩道東亞銀行，已經唔行得，心生一計，知道惡佬明一位親戚在軒尼詩道有寫字樓，於是電聯之下，一齊走上去寫字樓觀察形勢，三點幾見到維園先頭部隊抵達，但人群不斷向東行，唔係跟住先頭部隊向西，真奇。諗一諗，先明白群眾要走向維園，畀警察計人頭數，真係精神可嘉，如是者觀察咗兩個鐘頭，每秒鐘有幾百人走過眼前，重未見到肥佬黎出現，據電聯話佢重係被困維園曬緊太陽減肥。於是唔等得咁多咯，走落街插隊。香港人斯文到極，好守秩序，多數高呼反對二十三條嘅口號，年輕人嗌得特別起勁。曾鈺成對電視記者死撐話市民受誤導，真係令人笑甩牙。曾鈺成係邊個呀，溫總理唔多識，兩人見面，溫總理問：「報紙上見過你，你做邊行？」（據報紙新聞，用廣東話繙譯）喂，係民建聯主席噃，唔係李卓人噃，溫總理都唔知佢係邊個，係唔係受人誤導呀！