今晚就係第50屆台灣金馬獎舉行嘅日子，由於係50周年關係，今年出席嘅嘉賓特別重量級，而劉德華同噚晚喺「MAMA頒獎禮」表演歌舞嘅郭富城已經抵台，華仔負責同張曼玉一齊頒影后，佢話:「今天是負責頒獎的，支持金馬獎，也盼金馬獎能夠愈辦愈好。」被問到第2個小朋友幾時出世?華仔話:「還沒有！」

而城城就負責同張艾嘉頒發「最佳女配角」，佢落機之後好開心咁試開商務中心接駁車，仲搞笑話，「那我先走囉！」佢話希望金馬獎可以圓滿成功。

今年有份提名影后，而過往亦都多次提名金馬影后嘅鄭秀文，就喺微博話到咗台灣，不過佢唔知係咪提名提到已經有啲麻木，今年話自己「純粹參與」，佢話: 「到達台灣了。今天晚上是金馬獎的典禮，作為候選者的mi，這回對奬項（得獎）完全沒有期望，心情反而輕鬆自在沒負擔。『純粹參予(與)，做好本份』....然後.....哈哈哈.....終於......可以吃美味東西！天啊！好高興喔！我的胃好興奮！」就算冇獎，粉絲一樣咁支持你，唔好灰心呀!

另外，有份角逐金馬獎最佳男配角的型男彭于晏，今晚主要係「集郵」，佢話：「金馬奔騰50年，一段時光，一個歷史，能夠參加就已經很幸運，榮幸和這麼多前輩傳奇，一起見證這榮耀時刻，今天是去找偶像要求合照。」

不過今晚做表演嘉賓嘅何韻詩飛台灣就慶爆，佢喺微博話:「史上最爛航空公司scoot，飛機座位舊到像八十年代機艙商務連枕頭被子都沒有也都算了，櫃檯態度差，服務慢，而且不斷留難你！我知道投訴他們也懶理，凌晨機趕去台北換來一肚子氣，劣劣劣！」