杜如風被網友封為「世界級港女」，但佢好鍾意日本，曾經喺當地讀書，甚至叫東京做故鄉，佢覺得港女同日本妹有乜分別呢？杜如風坦言：「我唔識乜叫港女，啲人話我買咁多嘢係港女，啲嘢全部我儲錢買，關人乜事呢，咁我喺香港出世做嘢，是旦囉，港女囉。」

至於日本妹，杜如風話：「佢哋其實比香港女仔更甚儲錢買名牌手袋，佢哋唔食㗎，仲衰過我，平時我哋去日本旅行食燒肉，但我認識嘅日本女仔，一至日冇肉食，只係食菜，儲錢買Chanel，所以仲誇張，佢哋有冇工心計呃男人買嘢，我就唔知嘞，一直以為港女係有目的有組織工心計去o氹男人買名牌，但我同男友去旅行都係AA制，我出機票你出酒店，掃貨自己畀錢，咁點解覺得我係世界級港女呢？」

咁覺得香港定日本生活適合自己？杜如風話：「香港生活適合多啲，其實好恐懼日本交通，因為的士好貴搭唔起，永遠坐JR，迫到沙甸魚咁，以前part time做洗碗搭尾班車返屋企，恐怖囉，成個鐘頭雙手護住胸，全部酒氣紛紛，啲人飲完酒梗順手，癡漢借啲意摸你pat pat，日本女仔慣咗畀人騷擾，係一件好驕傲嘅事，佢哋覺得：『我唔靚唔搞我，我身材唔好唔搞我。』所以有次我畀人摸pat pat，我打佢係咁鬆踭，出聲啲人會覺得，你畀人抽水咁好嘅事仲要打人，呢個文化好奇怪，我接受唔到。」

喺公仔箱嘅杜如風講嘢慢半拍，手勢又多多，現實中嘅佢係咪咁呢？杜如風睩大眼話：「我真係講嘢講得好慢，（示範）入實驗室㩒緊急掣，哈哈！因為我拍旅遊節目係爆肚，一路講一路諗定下句，仲要講得好笑有point，所以個腦不停轉，令我講嘢慢咗。平時都係咁樣，好難特登設計手勢，難得大台仲未炒我囉，我冇形象，做番自己最開心，唔使扮淑女。」有冇諗過開talk騷？平時膽生毛嘅佢卻表示：「自己未有呢個膽量，因為talk騷要背好多嘢，我係背唔到嘢嘅人，驚自己一講唔知去咗邊，我永遠都係亂咁嚟。」