新城嫂內地辣模方媛(Moka)認真犀利,城城前度熊黛林等咗七年,都等唔到城城公開認愛,Moka話咁快已經獲城城確認女友名份,真係同人唔同命!
城城噚晚嘅微博貼嘅車廂拖手相,原來係Moka心目中晒愛嘅指定動作,城城肯配合女友愛的呼喚照辦煮碗,跟手仲把相片貼上微博公開戀情,睇嚟佢真係好冧呢位新城嫂喎!
今年9月20日,Moka曾經貼咗兩張車廂拖手相喺微博,留言:「據說這個動作只有最愛你的男人才會!你有過嗎?」呢兩張相同城城嘅拖手晒愛相甫士,幾乎一模一樣,分別只係相中男主角係鬼佬,同埋甫士除咗拖手外仲有錫手。
至於相中嘅女仔手就唔係Moka嘞,事關呢兩張張相喺微博被內地網友瘋傳,好多強國女都貼上網等等愛,原來Moka都曾經係等愛嘅一份子,雖然呢條微博已經畀Moka刪咗,但佢就等到郭天王肯陪佢做呢個晒愛甫士囉!
另外,深圳交警亦都喺微博轉貼張圖,仲cut咗城城微博水印,表示:「#警方提醒#開車時必須集中精力,千萬不要做與開車無關的事。不僅不安全,還可能引起其他錯誤效仿…」鄭希怡及何佩瑜(Jeana)都喺網上貼「拖手相」抽水!