最近投資市場可謂對壞消息完全免疫，甚至乎當好消息炒，例如之前標普將歐洲9個國家及歐洲金融穩定機制（EFSF）的評級下調，股市不跌反升，拍債反應又理想。
到前日標普再警告未來四周可能有更多歐洲地方及區域政府、政府相關實體與金融公司面臨降級，而同日惠譽趁熱鬧話月底可能將觀察名單中的6個歐元區國家全部降級，其中意大利可能連降兩級，但股市一樣繼續炒上，市場先生彷似跟評級機構說：「你即管發多啲警告啦，如果唔出個市邊有得升呀？」
另一方面，世界銀行亦下調今年全球經濟增長預估，並警告新興市場必須為歐債危機升級作好準備，不過，好友近日完全佔據形勢，點會理這些消息，全球股市繼續上揚，投資者不斷大喊「GoGoGo」，港股在此帶動下，昨日已補回11月初的巨大下跌裂口，挑戰20000點關口，成交更增至逾780億元，市況在龍年來臨前再度回復熱鬧。
以現時好友的勢頭，加上熊證堆積如山，20000點只屬心理關口，正路計好友真正的目標應是去年10月底的頂部。然而，近期不停有傳聞指中央會放水，但好多嘢一直只聞樓梯響。