當年今日
關於我們

蘋果批--《選舉》導演評08選舉:亂得嚟有HappyEnding - 楊卓華

蘋果日報 2008/09/10 00:00


同好多市民一樣,電影《選舉》嘅導演張虹覺得,08年立法會選舉劇情非常混亂,不過結局就相當出人意表,兼且仲係以喜劇收場……主持:楊卓華 高明輝

1

你套紀錄片《選舉》,係以04年立法會選戰為題,你覺得四年來香港嘅選舉文化有冇唔同?
導演張虹:
我覺得到咗今日都唔係改善咗好多,雖然我哋今次睇到投畀泛民嘅選民好似好識配票……但我唔知係我哋(市民)醒目咗,定係(泛民)真係好彩。
你點睇今次選舉結果?泛民力保不失,認為係咪代表選民對政治嘅認知多咗?

張虹:我覺得好意外,原本以為泛民好多人會墜馬,以新界東為例,五席都得咗,咁我就好意外,都幾開心,因為初初諗住泛民個情況幾差……不過有時我就喺度諗──係咪(泛民)好彩呢?我就唔覺得個(選民)認知多咗,因為我有啲朋友佢支持泛民,唔理三七廿一都投泛民。
你完成《選舉》之後曾經表示,覺得好多嘅選民其實係比較無知,點解有咁嘅睇法?

張虹:無知其實係包括我自己,因為我未拍(《選舉》)之前真係知好少嘢,因為喺報紙上面,你只可以睇到每個候選人講兩句咁多。(拍攝《選舉》)我哋有機會一路跟住佢哋兩個月,咁就有機會知多少少……我發覺佢哋(選民)都唔係好知乜嘢事,對於候選人政績、政綱都唔係好清楚,所知都係甚少。

2

你點睇𠵱家年輕選民政治上嘅意識形態?
張虹:我近年因為教書嘅關係,接觸啲大學生,咁我發現好多大學生同我講,「我哋唔需要普選吖」,我問點解呀,咁佢就話我哋其實都幾自由。可能佢唔明白呢啲自由係要爭取番嚟嘅,係可以冇嘅。
但佢哋就覺得有冇民主嘅分別都係一樣……𠵱家唔興(年輕人有政治理想),𠵱家年輕人嘅理想就係賺錢;唔係個個係咁,但係都比較多。
作為一個紀錄片導演,你覺得今屆選舉有啲乜嘢片段最值得紀錄?
張虹:我為咗剪呢條片(《選舉》),忙到冇時間跟呢次選舉,但係都知道個戰況好激烈,亦都好混亂。我覺得04年就冇咁混亂……
如果有人拍(紀錄片)嘅話,我會覺得黃毓民佢嘅拉票方法,另外仲有幾個區嘅辯論,聽講都好激、好犀利。

3

以電影角度嚟講,你覺得邊個候選人最有觀眾緣?
張虹:有啲人覺得係「長毛」(梁國雄)……佢口才較好,語言能力高,有啲大狀雖然講嘢叻,但都唔佢咁colorful……好似佢(在論壇中)可能會無啦啦講吓聖經,又講吓蘇格拉底,搞到田北俊都唔知點應付。
新一代嘅泛民之中,有冇一啲好似長毛咁有觀眾緣?譬如話落選但得票唔錯嘅陶君行同胡志偉,你又點睇?
張虹:胡志偉好親切,但我唔知親切對做立法會議員啱唔啱。陶君行就比較急躁,我諗佢要慢慢磨練下。如果你要有嗰種辯才,我諗你真係要讀吓書。鍾唔鍾意都好,佢哋兩位(黃毓民和梁國雄),都係讀過好多書……