【賢仔Call馬】季初千四有過強績！「蒙古王」落班殺晒（廖浩賢）
蘋果日報 2019/12/28 20:00
蒙古王廖浩賢賢仔call馬
蒙古王落三班跑1400米級數高
周日（29日）沙田跑十場泥草混合賽事，大彩池三T有423萬累積，六環彩有74萬多寶，預計一注獨分別派800及300萬，極具吸引力。
近期一眾二線騎師紛紛抬頭，剩係上周四（26日）利敬國及巴度各贏三場，表現有目共睹。尤其利敬國感覺越來越成大器，今次馬膽揀半冷門「蒙古王」，分分鐘有意想不到演出。
第八場三班1400米：牌面馬「大眾歡呼」、「順意寶」晨課表現都令人滿意，「大眾歡呼」雖然未能承接上季餘勢，但出動雷神抽三檔，馬房擺明要拼個明白；「順意寶」鍾意在三班孭輕磅，但排九檔有機會沿途被頂出三叠，好考留放發揮。
馬膽揀半冷門「蒙古王」，表面睇上季尾還挑戰皇太后盃及遮打盃兩場重要大長途賽事，或者有個錯覺係一匹中長途馬，但實際來港四季，跑得最好就係1400米，剩係計季初二班同程輸「大金庫」、「百步穿雲」兩馬位跑第四，賽績套落今場三班已經好夠用，預計有快步速，對呢匹鬥爆末段馬更加有利。
最睇唔透初出馬「疾風勁草」，馬主自家貨在愛爾蘭六戰四冠一亞一殿，埋門拍跳有馬在旁邊燒住走即有反應，出王牌蘇兆輝抽二檔，唔似陪跑。
第十場三班1650米泥地：「安賦」、「好鬥心」一對上仗串Q馬挾路再相逢，如果要秤表現，個人認為「好鬥心」更勝一籌。
上仗係第一次跑泥地同程，難度非常之高，沿途尾叠入直路掟出大外檔，只輸受讓八磅，兼在中內檔攝位而上的「安賦」馬頭位，今次「好鬥心」由何澤堯換雷神，而磅位距離只有五磅，重點係彼此排檔調轉，際遇及跑法上「好鬥心」都可以秤高多少。
「安賦」當然係好，本身演出如日方中，屬穩陣Q腳。「安喜」、「悅裕」要兜彎掟出大外檔衝，際遇會較蝕底。「大道至正」已一再泥地有過證明，大步馬要望空走，六檔反而有利，巴度近期搏殺得心應手，冷味盎然。
「鵰神」始終與史卓豐最夾，距離上仗接近一個月，埋門有大閘，丁仔作風亦都跑盡無保留。