同電訊公司高層C吹水，講開香港嘅三網融合，佢話香港嘅監管制度，真係非常之落後。高層C話，冇理由今時今日仲用「傳送方式」，去界定一個服務算唔算係電視節目。
舉個例，原來香港寬頻賣緊99元月費嘅bbTV，訊號經由電訊網直接傳送畀客戶，根據廣播條例唔會被視為電視節目服務。其實bbTV性質同nowTV一樣，無錯觀眾係少過TVB好多，但坐底都有幾十萬客戶。其他流動網絡商提供手機電視服務，亦都一概唔受廣播條例所監管。

電訊商節目乏善可陳

老老實實，對消費者嚟講，唔理係電腦用點對點軟件睇世界盃，用手機睇YouTube短片，定係用固網機頂盒睇電視，其實都無分別。我唔知高層C係咪想鼓勵政府盡快融合廣播同電訊兩個監管機構，從而將所有渠道嘅節目一併監管。
但作為消費者，我就當然唔希望係咁。雖則，電訊商提供嘅節目唔受監管，內容理論上可以非常大膽出位，但係睇返由電訊商提供嘅電視節目，無論固網定係手機，基本上都係乏善可陳，最多觀眾嘅頻道，可能都係外購內容，例如Animax、Discovery之類，反映電訊商喺製作內容方面有心無力。但若連容納創意嘅渠道都封閉埋，咁香港人睇TVB邊睇邊鬧嘅日子，好可能要再維持一段更長時間。
尹思哲