韓國Hip hop男歌手San E近日惹上是非，早前推出新歌《FEMINIST》，疑似批評女權主義者而引來爭議。San E日前於「BRAND NEW YEAR 2018」演出時再次陷入爭議，有觀眾將一隻寫有誹謗字眼嘅豬公仔擲上舞台，San E即爆粗辱罵女權主義者，台下觀眾即激動地要求佢道歉，最終San E被迫中斷演出。（相關新聞連結： https://bit.ly/2Q9vGG5）

San E嘅事件引起韓國媒體廣泛報道，而San E嘅所屬事務所噚日就爭議代為道歉，不過網民就唔受落，要求San E出面道歉。不過San E本人今日喺YouTube上載影片批評SBS電視台嘅報道係惡意剪接，刻意令大眾認為佢係嫌惡女性嘅人。San E喺片中講到：「你哋故意排除當時現場嘅狀況，刻意惡意剪接影片，然後報道假嘅新聞。」

San E續指自己喺Instagram上載咗當時真實情況嘅短片，表示：「我當時聽到性騷擾嘅發言，仲有人掟嘢上嚟叫我去死，對我造成人身攻擊，我先係受害人。對於侮辱我、向我掟嘢嘅人，我將會採取法律行動追究。」

對於被San E指控惡意剪接影片造新聞，SBS方面表示：「內部討論後會發表官方立場。」未正式回應事件。

精選韓流，喺晒《娛果》
http://fb.com/appledailyent