今季只得四場頭馬嘅祈普敦提早離約，近日已開始在悉尼上陣，小祈其實可以跑埋明戰（2日）先走，因為佢匹私家座騎「金如意」角逐第九場三班1800米草地。

「金如意」呢匹六歲馬，今場上陣五次都由佢策騎，獲得一冠一季一殿，最差嗰場都有第六名，參考今季往績，「金如意」場場都例追一段，估計今場都會有唔錯嘅機會跑入前五名，再拎到獎金。

小祈提早走人兼且可能留低寶藏，分分鐘益咗2019年仲未贏馬嘅史卓豐，「金如意」喺上季曾由豐豐胯下贏出谷草2200米大長途，人馬都合拍。豐豐重執帥權，佢亦一早做好晒功課，睇晒「金如意」今季嘅賽事片段。

史卓豐話「金如意」今季經常抽到外檔，所以被逼留後，但由於馬性忠心，成日能夠追得接近，而季內贏馬一役，「金如意」喺有利嘅二檔起步，能夠跟前少少，結果鬥贏三班惡氣十足嘅「活影」贏馬，可見檔位對呢匹長氣袋非常重要。

「金如意」今場喺6檔起步，檔位上已經好過對上兩場嘅10同9檔，際遇好嘅話，就有機會喺馬群中間位置競跑，唔使咁被動。

豐豐自個幾月前同苗禮德暫停合作後，連帶手風都轉弱，除咗連續七個賽馬日食白果之外，早前更因為不小心策騎，跑埋下期年初三（7日）賀歲馬後，就要停賽兩日。

今期連同「金如意」在內，豐豐一共有七匹座騎，支持度回升之餘，「區域快車」同「劍追風」上場都能夠上名，馬匹近況唔差，希望豐豐能夠把握機會，喺送歲賽日贏馬轉運。

編輯推介

【配搭落實】能否回復水準？巴基之星金盃又換人！
https://bit.ly/2Sm4Mv4

【熱門有隱憂？】潘頓指葉楚航新勝灰馬 今場要克服兩大難題
https://bit.ly/2S1Sh8E

【一代名將】爪皇凌雨最佳拍檔 墮馬久未康復宣佈掛靴
https://bit.ly/2Rw4YDw

------------------------------------------
10萬蚊 30人分！《動腦Q》新春Q多寶
年三十至初三 3:15pm、10:30pm
豬年動腦，Q多啲money！
http://bit.ly/2QW8LcI