九歲入行當童星的鄧一君，坦言自己不愛演戲，當年入行拍電影，也是為了方便看明星：「你哋睇明星好辛苦，又要係出面等，我值頭係佢隔離幾方便呀！」

雖然偶爾會戲癮發，但一君從沒想過再走演員路，除因前景問題外，他表示不想讓客戶覺得他不夠專業：「戲癮我係會有，但就唔會拍戲喇，拍戲始終時間好長好辛苦，同埋都唔想俾人感覺好唔專注好唔專業。」一君表示當他戲癮發作時，就會跟幾個志同道合的朋友一同拍攝短片來「頂癮」，2010年，他更自編自導了一齣約19分鐘的微電影，放於其社交平台上。

回想當年拍攝點滴，一君表示印象最深刻的是與袁詠儀、任達華合作的電影《暴雨驕陽》。「我仲記得當年考會考，咁啱當時我拍緊《暴雨驕陽》，第二日考中文，我拎住本書喺片場讀，但外面就拍緊鎗戰砰砰啪啪，嘈到根本讀唔到。」一君笑說。

那些年的童愛玲與盧愛倫，一個御姐feel、一個鄰家女孩，兩位都是男生眼中的女神。當年的鄧一君，曾在電影中周旋於二人之間，便令不少男生為之妒忌，但一君卻指他當時並不懂享受這福利：「我比較遲熟，細個都係鍾意睇卡通，好少諗女仔、異性嗰啲嘢，我18、9歲先至拍拖，所以我拍嗰套戲時其實好難拍，因為我都唔知講乜，不過導演好叻，搞到我好似好識做戲，仲提名埋金像獎。」

如今不用於幕前工作，一君身型亦發福了不少，對此他笑謂：「因為依家唔駛出鏡，所以我就冇keep，同埋依家肥咗，畀人個感覺仲敦厚咗穩重咗，生意仲好咗，如果我瘦返，反而似個死0靚仔咁，仲衰呀！」