當年今日
關於我們

【名家即時睇】毅行者比ALS更唔環保(高明)

蘋果日報 2014/08/29 06:00

毅行者ALS

ALS熱潮進入尾聲,反對嘅聲音開始壯大,批評玩過嘅人嘥水、唔道德、又話人哋人云亦云之類,身為玩過嘅人,係時候回應下,如果唔係畀呢種負能量批評蔓延落去,以後世上有任何新橋、新發明、創業,都會被呢班係又鬧唔係又鬧嘅人淋熄創業團火,對人類、文明、地球都有害。

ALS活動,只係淋下水,有人條件反射咁話,嘥水,第二,拎漸凍人痛嚟自我感覺,不道德。

如果以呢把尺去衡量,特區之內,最邪惡嘅活動,首推毅行者。先唔好提舉辦者樂施會之前因「毅行爭普選」扮中立疑賺維穩費,毅行者年年上山,目的係為咗扶貧。

反ALS人士話,捐款咪捐款,唔使嘥水。同理,想支持樂施會,捐款咪捐款,唔使買行哂裝備、提前幾個月訓練、宣傳、人力物力協辦活動、記者報導,耗用大量資源,一筒水喺毅行者活動前,所用資源變得微不足道。

另外,據講活動淋冰感受漸凍人感受唔啱。毅行者就更加過份,明明籌款目的係扶貧,美其名「毅行」,山區貧窮人士見到嘅係:幫佢哋籌款嘅人,身光頸靚咁「模擬」窮人每日面對嘅艱苦生活,為咗訓練而攝取嘅營養,可能係人哋一年嘅營養,呢種「同理心」唔見比ALS有咩咁高尚。但我冇見過批評ALS嘅人講毅行者半句不是。

反ALS人士,既環保又道德,可惜ALS熱潮就完,唔啱咁,毅行者一年一度,你哋都去反吓囉!

最後,本欄挑戰過唐牛、沈大師及葉朗程。多謝唐牛同沈大師「回應訴求」,好玩嘅係,唐牛一線,傳幾傳落老樓再傳返去新地雷霆,沈大師一線傳咗入DBC,希望有心人都可以發明到下個好玩又有感染力的籌款方法!

高明

神奇‧頂級‧超卓,盡在偶像派財演高明Facebook專頁:
https://www.facebook.com/BigRiceTea