蘋果慈善基金今日搞慈善高爾夫球大賽，主禮開球係「馬神」馬德鐘，而落場嘉賓就有王敏德、JoeyTang、林敏驄、鄧梓峰、陳保元、吳忻熹及林韋辰等，馬神一向鍾意做運動，出番一身汗，保持健康體魄，就算47歲亦晒出胸肌，真係點到你唔服!

約早上11點到，問起馬神幾時學golf，佢講：「喺馬來西亞學，見到啲golf場好靚，自己想落去行吓，但唔識佢又唔俾行，就學吓囉!」馬神認為打golf係幾難學嘅運動，直言：「我都自命有啲運動天份，係一個運動員，咁俾個咁細嘅波搞掂，好難先打到咁細嘅波，要花時間落去，但我覺得係非常好嘅運動，因為打golf，打到咩年紀都可以做呢個運動，好有益身心，又可以考驗自己耐性。」

馬神又指，自己返嚟香港，本身有自己練吓，不過自己睇唔到有邊步唔啱，有搵過教練指點，佢認為：「golf係難學難精，冇freelunch，一定要放時間落去，我希望有日打得好!」問到佢會唔會同囝囝一齊學，馬神直言：「本來係同佢一齊學，但係佢要返學，又要學游水，希望第日等我打好啲嘅時候，我再感染下佢!」

另外，馬神近年轉戰大陸拍劇以主，佢就話本來傾咗套劇係3月拍攝，不過套劇延期，所以目前多咗時間，可能係呢個機會畀佢練下golf。