袁偉豪喺國慶日因為急性腸胃炎留醫，搞到唔可以去到大陸一個廣場出席活動，結果佢喺微博拍咗一段51秒嘅片親口道歉。(新聞連結： https://bit.ly/2OHf8nz )小休幾日之後，袁偉豪今日去咗澳門出席活動，但係袁偉豪嘅狀態似乎仲係唔多好，左眼有啲紅筋！

不過袁偉豪話今日嘅情況已經好咗好多：「隻眼係因為之前嘔得太用力，搞到微血管都爆咗，o依家體力都恢復番。嗰日我都冇留院，剩係吊咗鹽水，打咗針，就問醫生可唔可以出院。」係咪損失咗一個國慶活動？佢話：「公司o依家同嗰邊傾緊，安排另一次嘅活動。雖然大家都冇損失，不過都覺得唔好意思，因為病就唔去人哋嘅活動，所以拍咗條片俾大家知狀況，希望大家明白。」

網民笑佢再三道歉，係咪擔心失約打爛自己嘅飯碗？袁偉豪解釋：「其實呢個係專業，為自己負番責任。我都有評估過，肚又唔舒服，萬一遇上塞車，都未必處理到件事，好似你咁講，都唔想破壞大家嘅合作關係。」又稱：「我o依家進入休息心情，過幾日同埋媽咪去日本旅行，女友都會一齊去，我今次一個帶6個人出去玩，希望可以放鬆心情，好好休息。」要準備定多啲子彈去shopping喎！袁偉豪就話：「已經準備好，到時睇吓有乜需要就盡量安排，希望佢哋玩得開心，呢個都係我同媽咪嘅一個心願，之前一直拍劇都冇時間陪佢。」

唔知會唔會順道求婚？袁偉豪就話：「你哋幫我諗埋？未有呢個計劃住，唔好令大家誤會，唔係屋企人會以為係真，當係去視察下環境先喇。」下個星期係張寶兒生日，睇嚟到時會順道慶祝。

另一邊廂嘅張寶兒今日喺將軍澳出席活動時就話，此行同袁媽媽一齊去，唔擔心有爭拗，因為之前一齊食過飯，佢仲話同男友有共識，o依家以事業為重，唔會求婚玩驚喜。

精選娛聞，喺晒《娛果》
http://fb.com/appledailyent