近日武漢肺炎全球肆虐,好多藝人工作被叫停,Rain就留港避疫,日前下午,《蘋果》喺大坑見到佢揸白色名車,同老公去渣甸山附近嘅超市。當時Rain着住黑色衞衣同牛仔褲,𡥼住近9萬元嘅名牌手袋,而Eric就着黑tee同牛仔褲裝束,佢哋都有戴上口罩防疫。
Rain夫婦喺超市內不時蹺手又互相攬腰,Rain間中更會向老公撒嬌,非常恩愛似足「連體嬰」。佢哋主力買日常生活用品同食材,而且佢哋都好尊重對方嘅意見,每揀一樣嘢都有商有量。Eric全程推住手推車,埋單後就由Eric負責拎住兩大袋貨品,之後Rain再次負責揸車,直接返大坑愛巢。兩公婆生活如常,住豪宅揸靚車,似乎未受追債傳聞影響,而佢哋住嘅1,200呎單位,翻查資料係Rain於2012年以1,600萬元買入。