踏入埋數期，盈喜、盈警消息再次佔領上市通告欄，馬鋼（323）同鞍鋼（347）終於要步重鋼（1053）發盈警嘅後塵，噚日呢對鋼鐵孖寶出現洗倉式下跌，大行更群起出報告插之。之不過咁，盈喜股表現亦唔係隻隻好，好似中聯重科（1157），預期舊年盈利有55%至75%增長，不過睇真啲，上半年盈利增長數以倍計，即係話下半年其實係大幅放緩，如果以下限計，第四季表現仲衰過第三季，難怪股價不升反跌。歐舒丹（973）就唔同喇，上季銷售按季大升68%，股價即爆近7%。
如果戰友們想坐一轉盈喜快車，可以留意吓隻中國玉米油（1006），早前預喜全年盈利錄得增長，但就冇講幅度，惹來炒作空間，隨時好似另一隻盈喜股金界（3918）咁，升到你唔信。用中期盈利做指標，全年保守估計賺2億銀，到時PE又落番10倍樓下，玉米油噚日收報3.72元，現價買入，上4字頭應冇難度。
唐牛