近排我睇新聞，見你為咗香港民主發展傷神，真係好感動，事關大家都知全面普選十畫未有一撇，你仲咁上心真係唔話得，因此知道你仆親跌傷後，我嘅心情特別沉重，真係寧願跌倒嗰個係我，就好似當年英國個鐵娘子喺人民大會堂外邊咁樣仆街。你今次仆倒，唔通同話你扮民主英雄有關？如果真係咁，就真係要再澄清多一次，我唔係針對任何人，更加唔係針對陳太你，實情只係我亂噏、廢噏，即係你哋廣東話鬧人嗰句：衰多口。
今次你跌傷，其實我仲賴嘢，事關我講咗心嗰句，卻唔係阿爺口嗰句，喺京城做官，最緊要識睇風向（你做官多年，呢方面一定好有心得），我嗰日唔知撞鬼定上咗身，竟然爆響口講咗啲阿爺唔畀講嘅嘢，之後我都知衰，行入人民大會堂時好多人望住我陰陰嘴笑，有個香港人大代表（邊個就費事講啦）仲拍拍我膊頭豎起手指公，我知佢想講乜：「老兄，都係你最勇！」
掛個勇字喺心口嘅後果，就係要自打嘴巴，然後掛個𤓓字喺背脊俾人插，我收到風，呢兩日不斷有人打小報告，𠵱家咁多人大、政協喺北京，今次真係多得佢哋唔少，有人話小曾嗰邊都好似有搞作，呢層我就唔擔心，我根正苗紅，使怕一個港英餘孽？
對唔住，講咗咁多題外話，我今次係祝陳太你早日康復，你做事向來見步行步，今次意外相信只係一時唔小心，正如你所講，香港民主路唔易行，而且條路仲有排你行，第日要睇路。保重。
李八方代筆