韓國演藝圈先後爆出多位資深男星涉性騷擾及性侵，近日現年31歲嘅After School前成員劉小英喺節目中都提及自己被性騷擾嘅經歷，更引來網民嘅熱烈討論。

劉小英喺節目上提及佢之前為咗轉型做演員，所以就報名上表演課，希望令自己演技有所提升，當時教授課程係一名好出名嘅演員，劉小英指該名老師喺堂上要求學生把上衣捲起，捲到好似內衣一樣，又要男女學生面對面緊緊靠住企，當時劉小英覺得唔妥，就話自己做唔到，搞到老師好嬲話個個都做到點解佢會做唔到。由於劉小英堅持唔肯做，老師亦要佢即時離開教室，劉小英仲係喊住跑出去，之後佢亦冇再上課。不過佢就話呢位演員老師依然活躍演藝界，即時令到一眾網民都好奇佢所講係邊個。

事實上，去年劉小英亦曾喺節目上談及性騷擾事件，佢話：「跟某公司老闆簽約時，表示第二日有新同事，要我一齊去聚會同飲酒。聚會結束後話送我返屋企，然後於的士上就捉住我嘅手。當時想先送走對方而落車，不過佢又話要去傾計，因為好驚，所以去咗24小時營業嘅快餐店。一坐低佢嘅手就冇停過，佢又話將我當成女人，好鍾意我，喺我講OK之前唔會畀我返屋企。」

另外，近日有份演出tvN新劇《Cross》嘅52歲男星曹在顯，早前被爆涉性騷擾劇組女工作人員及女新人演員，近日再有女記者爆料指曾被曹在顯性騷擾，當時曹在顯接受訪問，之後仲試圖強吻女方。

更多韓流，喺晒《娛果》
http://fb.com/appledailyent